मानबहादुर विश्वकर्मा, पीएचडी

डा. मानबहादुर विश्वकार्माले सन् २०१० मा त्रिभुवन विश्वविद्यालयबाट सामाजिक समावेशीकरण र लघुवित्त विषयमा विध्यावारिधि गर्नुभएको छ भने संयुक्त राज्य अमेरिकाको Brandeis University को Fulbright Visiting Scholar 2016/17 को रूपमा खाद्य सुरक्षामा post-doctorate अनुसन्धान गर्नु भएको छ । सन् २००४ मा उहाँले नेदरल्याण्डको International Institute of Social Studies बाट सामाजिक अध्ययनमा पोस्ट ग्र्याजुएट डिप्लोमा, सन् २००० मा अर्थशास्त्रमा स्नातकोत्तर सन् २०९१ मा सोही विश्वविद्यालयबाट वित्तीय व्यस्थापनमा स्नातकोत्तर र सन् १९९७ मा जापानबाट कृषि सहकारी विषयमा डिप्लोमा तहको अध्ययन पूरा गर्नुभएको छ । उहाँले जीटीजेड, सेभ द चिल्ड्रेन, यूनिसेफ, सीडब्ल्यूएस यूके, यूएनडीपी लगायत विभिन्न अन्तराष्ट्रिय सहयोग नियोगहरूमा लामो समयसम्म कार्य गर्नुभएको छ । नेपालको पहिलो संविधान सभाको अवधिमा यूएनडीपीले सहयोग गरेको संवैधानिक संवाद केन्द्रको नेतृत्व गर्नुभएकाले समेत उहाँमा द्वन्द्व, शान्ति र संविधान निर्माण प्रक्रिया जस्ता विषयमा विशेष अनुभव रहेको छ । सन् २०१० मा उहाँले सह-सचिवको रूपमा नेपालको निजामती सेवा प्रवेश गर्नु भएको थियो भने तत्पश्चात् श्रम विभागको महानिर्देशक, विभिन्न जिल्लाहरूमा प्रमुख जिल्ला अधिकारी र प्रदेश सरकारका सचिवको रूपमा सेवा गर्नुभएको छ । सन् २०२१ मा निजामती सेवाबाट अवकाश पश्चात् उहाँले त्रिभुवन विश्वविद्यालयमा स्नातकोत्तर र एमफिल तहमा अध्यापन गर्दै आउनुभएको छ । डा. विश्वकर्माका महाविद्यालय तहका र विकास तथा लघुवित्तमा सामाजिक समावेशीकरण तथा भोकमरी उन्मूलनसँग सम्बन्धित दर्जन बढि पुस्तकहरू प्रकाशित छन् ।

श्री गङ्गादत्त अवस्थी

श्री गंगादत्त अवस्थीसँग सरकारी सेवाको विभिन्न पदमा रही ४० वर्ष भन्दा बढिको कार्यानुभव रहेको छ । अवकाश पश्चात उहाँ स्वतन्त्र परामर्शदाताको रूपमा काम गर्दै आउनुभएको छ । श्री अवस्थीले संघीयता, नेपालको स्थानीय तहसमेतको सुशासन र योजना तर्जुमा, स्थानीय राजश्व परिचालन, संगठन तथा व्यवस्थापन, अनुगमन तथा मुल्यांकन लगायतका क्षेत्रहरूमा अध्ययन अध्यापन गर्नुका साथै स्थानीय तहका लागि आवश्यक निर्देशिका र हातेपुस्तिकाहरू निर्माणमा योगदान गर्नु भएको छ । साथै, उहाँले आफ्नो विज्ञता भएको क्षेत्रमा सरकारी र गैर-सरकारी सरोकारवालाहरूलाई तालिम दिदैं पनि आउनुभएको छ ।

प्रा. श्रीकृष्ण श्रेष्ठ, पीएचडी

प्रा. श्रीकृष्ण श्रेष्ठ ४२ वर्ष देखि सार्वजनिक प्रशासन र सुशासन प्राध्यापन गर्दै आउनु भएको छ । उहाँले एसियाली विकास बैंक र विश्व बैंक लगायतका वहुपक्षीय निकायहरूको सहयोगमा संचालित नेपाल सरकारका सुशासन सम्बन्धी धेरै कार्यक्रमहरूमा संलग्न भई कार्य गर्नु भएको छ । उहाँले दुई दशकसम्म प्रो-पब्लिकको (सार्वजनिक हित र सुशासन सम्बन्धी कार्य गर्ने गैरसरकारी संस्था) नेतृत्व गर्नु भएको छ भने सार्वजनिक सेवा प्रवाह, सत्यनिष्ठा र सुशासन सम्बन्धि विविध अध्ययन गर्नुका साथै विभिन्न मंचहरूमा उहाँका सो सम्बन्धी लेख तथा पुस्तकहरू प्रकाशित छन् ।