केन्द्र ३: कानुनी तथा सामाजिक मामिला नीति अध्ययन केन्द्र

k|f=8f= z/b jGt

प्राध्यापक डा. शरद वन्तले पूर्व सोभियत संघबाट एमबिबिएस (१९८४), बेलायतबाट एमपिएच (१९९२) र डेनमार्कबाट पीएचडी (१९९९) गर्नु भएको छ । प्राध्यापक वन्त चिकित्साशास्त्र अध्ययन संस्थान, त्रिभुवन विश्वविद्यालयका पूर्व प्राध्यापक (समुदाय चिकित्सा तथा जनस्वास्थ्य) र सहायक डीन (प्राज्ञिक) हुनुहुन्छ । उहाँले नेपाल स्वास्थ्य अनुसन्धान परिषदको सदस्य सचिव तथा नेपाल सरकारको एचआइभी नियन्त्रण बोर्डको कार्यकारी उपाध्यक्षको रूपमा पनि सेवा गर्नुभएको छ । हाल पिपल्स हेल्थ मुभमेन्ट नेपालको कन्ट्री कोअर्डिनेटर तथा सामाजिक उत्तरदायित्वको लागि चिकित्सक, नेपालको अध्यक्षको रूपमा कार्यरत प्राध्यापक वन्तका जनस्वास्थ्य सम्बन्धी थुप्रै लेखहरू विभिन्न राष्ट्रिय र अन्तर्राष्ट्रिय जर्नलहरूमा प्रकाशित छन् ।

पुष्पा भुसाल हाल प्रतिनिधी सभाको सदस्य, नेपाली कांग्रेसका सचेतक तथा वरिष्ठ अधिवक्ता हुनुहुन्छ । उहाँ पच्चीस बर्षभन्दा बढी समयदेखि कानूनको अभ्यास गरिरहनु भएको छ र विगत बीस बर्षदेखि नेपाल कानून समाजसँग सम्बद्ध हुनुहुन्छ । उहाँ महिला अधिकारकर्मी समेत हुनुहुन्छ भने संविधानसभाको पूर्व सदस्य हुनुहुन्छ । उहाँले दक्षिण अफ्रिकाको १९९४ को आम चुनावमा पर्यवेक्षकको भूमिका निभाउनु भएको थियो । उहाँले राजनीतिशास्त्रमा स्नातकोत्तर र कानूनमा स्नातक तहको अध्ययन गर्नुभएको छ ।

डा. विपिन अधिकारी एक वरिष्ठ संवैधानिक विशेषज्ञ र नीति विश्लेषक हुनुहुन्छ । उहाँ काठमाण्डौ युनिभर्सिटी स्कूल अफ लमा कानूनका प्राध्यापक र संस्थापक डीन हुनुहुन्छ । संवैधानिक कानूनमा दिल्ली विश्वविद्यालयबाट पीएचडी गर्नु भएको डाक्टर अधिकारी वरिष्ठ अधिवक्ता पनि हुनुहुन्छ । डा. अधिकारीको संवैधानिक कानून र सार्वजनिक नीतिमा महत्वपूर्ण शैक्षिक र व्यावसायिक दखल छ । संवैधानिक कानून बाहेक, उहाँ संस्था निर्माण, मानव अधिकार, न्यायमा पहुँच, पूर्वाधार विकास, कानूनी सुधार, शासन र लोकतान्त्रीकरण प्रक्रियाको क्षेत्रमा एक विशेषज्ञका रूपमा चिनिनुहुन्छ ।

डा. बिन्दा पाण्डेसँग लैंगिक न्याय, अधिकार र नीति निर्माण क्षेत्रमा दशकौं लामो कार्यानुभव छ । सन् २००२ देखि २००४ सम्म उहाँले राष्ट्रिय महिला आयोगको संस्थापक सदस्य,  २००८ देखि २०१२ सम्म संविधान सभा सदस्य र सन् २०१७ देखि संघीय संसदको सदस्य भई कार्य गर्नुभएको छ । उहाँ हाल जिफन्ट ट्रेड यूनियन पोलिसी इन्स्टिच्युटको अध्यक्ष हुनुहुन्छ ।

उहाँले सन् २००२ मा लैंगिकता र विकास विषयमा एसिएन इन्स्टिच्युट अफ टेक्नोलोजी, थाईल्याण्डबाट स्नातकोत्तर तह र सन् २०१७ मा काठमाडौँ विश्वविद्यालयबाट राजनीतिमा महिला सशक्तिकरण विवषयमा विद्यावारिधि उपाधि हासिल गर्नुभएको छ ।

नेपालका प्रख्यात शिक्षाविद् प्रा. वाग्ले विगत चार दशक देखि नेपालको उच्च शिक्षाको शैक्षणिक प्रक्रियामा संलग्न हुँदै आउनुभएको छ । उहाँले तीन दशक त्रिभुवन विश्वविद्यालयमा प्राध्यापक र काठमाडौँ विश्वविद्यालय अन्तर्गत पाँच वर्ष डीन भई कार्य गर्नुभएको छ भने सोही विश्वविद्यालयमा दश वर्ष देखि प्राध्यापकको रूपमा कार्यरत हुनुहुन्छ ।

प्राध्यापक वाग्लेले संयुक्त राज्य अमेरिकाको Southern Illinois University बाट एमएस र पीएचडी तह पूरा गर्नुभएको छ । उहाँ शैक्षिक नीति, STEAM शिक्षा, प्राविधिक शिक्षा तथा ब्यावसायिक तालिम र राष्ट्रिय योग्यता प्रारूप जस्ता विषयहरूमा विशेष रुचि राख्नुहुन्छ ।

डा. नेत्रप्रसाद तिम्सिनाले त्रिभुवन विश्वविद्यालय अन्तर्गतको कृषि तथा पशु विज्ञान अध्ययन संस्थानबाट अन्डरग्र्याजुएट तथा संयुक्त अधिराज्यको यूनिभर्सिटी अफ रीडिंगबाट राजनीतिक अर्थतन्त्र तथा प्राकृतिक स्रोत व्यवस्थापन विषयमा पोस्टग्र्याजुएट तह पूरा गर्नु भएको छ ।

डा. तिम्सिनासँग राष्ट्रिय, क्षेत्रीय तथा अन्तराष्ट्रिय तहको विकासको राजनीतिक अर्थतन्त्र र प्राकृतिक स्रोत व्यवस्थापन सम्बन्धी नीति अनुसन्धानमा बृहत् ज्ञान र अनुभव छ । उहाँ तीन दशक देखि दक्षिण एसियाको सामाजिक आन्दोलन खासगरी गरिबीका संरचनागत कारणहरू, असमानता र अन्याय जस्ता विषयमा र समष्टि तथा सुक्ष्म तहको राजनीति र नीतिलाई जोडी अध्ययन अनुसन्धान कार्यमा संलग्न हुँदै आउनुभएको छ ।