डा. सूर्यराज आचार्य National Institute of Technology (NIT) जमशेदपुर, भारतबाट सिभिल ईन्जिनीयरिंगमा स्नातक र त्रिभुवन विश्वविद्यालयबाट अर्थशास्त्र विषयमा स्नातक हुनुहुन्छ भने थाइल्याण्डको Asian Institute of Technology बाट स्रोत व्यवस्थापन (इन्जिनीयरिंग) मा स्नातकोत्तर तथा जापानको टोकियो विश्वविद्यालयबाट विद्यावारिधि उपाधि प्राप्त हुनुहुन्छ । डा. आचार्य पूर्वाधार नीति, योजना तथा व्यवस्थापन क्षेत्रको विज्ञ हुनुहुन्छ भने हाल उहाँ ईन्जिनीयरिंग अध्ययन संस्थान पुल्चोक क्याम्पसमा अतिथि प्राध्यापकरूपमा कार्यरत हुनुहुन्छ । उहाँसँग नेपाल सरकार, UNESCAP बैंकक् र Institute for Transport Policies Studies (ITPS), टोकियोमा काम गरेको अनुभव रहेको छ । उहाँले जापानको टोकियो स्थित National Graduate Institute for Policy Studies (GRIPS) मा Adjunct प्राध्यापक र र University of Tokyo मा अतिथि प्राध्यापकको रुमपा अध्यापन पनि गर्नुभएको छ ।
केन्द्र १: आर्थिक तथा पूर्वाधार विकास नीति अध्ययन केन्द्र
डिल्लीराज खनाल, पीएचडी
पूर्व विधायक तथा राष्ट्रिय योजना आयोगका पूर्व सदस्य डा. दिल्लीराज खनाल सन् १९८६ मा विद्यावारिधि उपाधि आर्जन पश्चात निरन्तर अनुसन्धान, अध्यापन र सामाजिक क्षेत्रमा क्रियाशील हुनुहुन्छ। हाल उहाँ त्रिभुवन विश्वविद्यालय अन्तर्गतको अन्तराष्ट्रिय सम्बन्ध र कूटनीति विभागमा विद्यावारिधि तहमा अन्तराष्ट्रिय राजनीतिक अर्थतन्त्र अध्यापन गर्नुहुन्छ । उहाँ सन् १९९५ मा स्थापना भएको Institute for Policy Research and Development (IPRAD) को संस्थापक अध्यक्ष हुनुहुन्छ ।
डा. खनालका एकल र सयुक्त रूपमा प्रकाशित विभिन्न विषयका पुस्तकहरू, नीति सम्बन्धी लेख र प्रतिवेदनहरू प्रकाशित छन् । यूएनडीपी र राष्ट्रिय योजना आयोगले सन् २०२० मा संयुक्तरूपमा प्रकाशन गरेको नेपालको मानव विकास सम्बन्धी प्रतिवेदन – Nepal Human Development Report 2020 को प्रमुख लेखक हुनुहुन्छ । उहाँका प्रमुख प्रकाशनहरूमा सन् २०१७ मा त्रिभुवन विश्वविद्यालय अन्तर्गतको अर्थशास्त्र केन्द्रीय विभागद्वारा प्रकाशित आत्मनिर्भर विकासको राजनीतिक अर्थतन्त्रमा नेपालले गरेको अभ्यास, सन् २०१४ मा एड्रोईट प्रकाशन ( न्यु दिल्ली) ले प्रकाशन गरेको वैश्विक तथा नेपालको अर्थतन्त्रको सम्बन्धमा नीति सम्बन्धी वास्तविक विषयलाई मूलप्रवाहिकरण गर्ने विषयको पुस्तक प्रमुख हुन् । यसैगरी, अन्य प्रमुख प्रकाशनमा सन् २०१२ मा प्रकाशित नेपालको सामाजिक संरक्षण र सुरक्षा सम्बन्धी पुस्तक, सन् २०१० मा प्रकाशित दक्षिण एसियाको एकीकृत विकासका विषय र मार्गचित्र सम्बन्धी पुस्तक, सन् २००८ मा प्रकाशित गरिबी निवारण सम्बन्धी अन्तर्गतका विदेशी आर्थिक सहयोगको प्रभावकारिता, सन् २००५ मा प्रकाशित नेपालको राजनीतिक र संस्थागत सुधार सम्बन्धी पुस्तकहरू रहेका छन् ।