केन्द्र ३: कानुनी तथा सामाजिक मामिला नीति अध्ययन केन्द्र

बहुविषयलाई समेट्ने यस नीतिअध्ययन केन्द्रका क्रियाकलापहरू यस केन्द्रअन्तर्गतका एकाइहरूले समेट्ने व्यापक विषयका नीति अनुसन्धान र संवादमा केन्द्रित रहन्छन् । आमनागरिकहरू सार्वजनिक नीतिप्रक्रियाको केन्द्रमा रहनु पर्द्छ भन्ने मान्यतामा आधारित भई यस केन्द्रले कार्य गर्दछ । यस केन्द्रअन्तर्गत तीन एकाइहरू रहेका छन् :

३.१ कानुनी मामिला एकाइ

यस एकाइले संवैधानिक प्रावधान, राष्ट्रिय ऐनहरू, मानव अधिकारलगायतका विषयसँग सम्बन्धित नीतिप्रक्रिया एवम् मार्गनिर्देशसम्बन्धी अनुसन्धान गर्दछ । सङ्घीय र सो भन्दा तल्लो तहका सरकारहरूकाबिच कानुनी र संवैधानिक अधिकारसँग सम्बन्धित सहयोग र समन्वय तथा उनीहरूबिच देखिने विवाद समाधानसम्बन्धी विविध विषयहरूमा अनुसन्धान र सार्वजनिक संवादजस्ता विषयसमेत यस समूहको कार्यादेशभित्र पर्दछन् ।

३.२ शिक्षा नीति एकाइ

शिक्षा, शैक्षिक प्रणाली तथा नीति र तिनीहरूको अभ्यास, शिक्षाको राजनीतिक र सामाजिक आधार, शिक्षाको गुणस्तर, शिक्षामा सबैको पहुँच, समतामूलक र जीवनोपयोगी शिक्षा, शैक्षिक नवप्रवर्तन, शिक्षा र रोजगारी लगायतका शिक्षाका समग्र आयाम र विषयमा केन्द्रित भई यस नीति एकाइले नीति अध्ययन गर्ने गर्दछ ।

३.३ स्वास्थ्य नीति एकाइ

देशको समग्र स्वास्थ्यप्रणाली, सेवा, अभ्यास, समस्या, प्राथमिकता र यस क्षेत्रका अन्तर्राष्ट्रिय ज्ञानसमेतलाई मध्यनजर गरी अनुसन्धान, विश्लेषण र बहसमार्फत नीतिनिर्माणमा सहयोग पुर्‍याउनु यस एकाइको उद्देश्य रहेको छ ।

३.४ समाज कल्याण तथा सामाजिक सुरक्षा एकाइ

सामाजिक सुरक्षा र न्याय, लैङ्गिक समानता तथा सामाजिक समावेशीकरणलगायत अपाङ्गता भएका व्यक्तिहरूको सामाजिक सुरक्षा, गरिबी र बालबालिका, युवा, ज्येष्ठ नागरिक एवम् अल्पसङ्ख्यकहरूको आवश्यकता र सामाजिक संरक्षणलगायतका विषयहरूको यस एकाइले नीति अध्ययन गर्दछ ।